CICI CORNACCHIA

CONCETTA sua moglie

Don RAFELI CAVALLO

Donna GENOVEFFA CAMPA in CAVALLO

RACHELE CAVALLO la figlia

 

 

 

 

CICI: (entra con la legna per il fuoco in braccio a la posa sotto al caminetto) Brrr! Enchia ce friddu ca faci ‘sta matina!

 

CONCETTA: Sini…? ce tiempu sta’ iata ‘da fori Ci’?

 

CICI: Stai la chitratura Cunce’! e ‘nu tiempu ca non mi stà piaci filu. (vedendo che la moglie prepara la gialletta) Caraca caraca; mintinci n’atru picca ti pipinu da intra, ci noni, ‘sta matina, la ronca non ci tagghia.

 

CONCETTA: Ammu ‘ncuminzatu prestu cu li scilazzi auannu; sapi ce ndi stà spetta ‘sta ‘nvirnata ca trasi?

 

CICI: Tiempi ti fami Cunce’…! (prende il fiasco del vino che si trova sopra ad una mensola vicino al letto del figlio e borbotta) Eeh…! Viti ‘da ce vita, vi’!

 

CONCETTA: Lassulu sciri, maru figghiu; no’ lu ‘discitari!

 

CICI: Si…! Cu no’ si scumagna!

 

CONCETTA: Ce c’entra; ci lu ‘diesciti poi…, allu megghiu…!

 

CICI: Ce succeti? Si aza picciusu eti?

 

CONCETTA: Noni, tici ca picciusu…! ‘Settiti e mangia me!

 

CICI: E mangiamu…! Ma chiamulu cudd’atru; cu si aza amprima.

 

CONCETTA: E c’ava fari ca si aza moni; è prestu ‘ncora!

 

CICI: Pi mei non è mai prestu; cu si aza aggiu tittu, ci noni, mo’ penzu iu cu lu ‘desciutu!

 

CONCETTA: (senza aggiungere altro ed a mala voglia chiama il figlio) Pascalinu…! (scuotandolo) Pascali’!

 

PASCALINO: Mmmh!

 

CONCETTA: Pascali’…! Aziti la mamma me!

 

CICI: (facendo il verso alla moglie) Aziti figghiu me…! (poi con tono autoritario) Aziti e sbocca sangu…! Minti li pieti n’terra e muviti ti pressa, ci noni, mo’ pigghiu ‘na mazza e ti spezzu li spaddi…! (rifacendo il verso c.s.) A capitu Pascalinu mia?

 

CONCETTA: (sottovoce e quasi supplicando il figlio) Aziti, sbrichiti la mamma me; ca po’ ti cuerchi n’atra vota.

 

PASCALINO: (si alza molto lentamente e resta seduto sul letto a sbadigliare e stiracchiarsi. In testa porta una papalina ed addosso un’ampia camicia da notte che si toglie per restare con i vestiti di sempre) Portu ‘nu suennu…?

 

CICI: Viti cuddu c’è ‘ngraziatu! Tuttu vistutu si corca.

 

PASCALINO: Siiih, tuttu vistutu…! Iu lu giaccu cu li scarpi mi li ‘levu ci no’ sentu cautu e mi sentu ‘taccatu…!

 

CICI: E manu mali, ci noni ‘ntra cuddu fostru nc’erunu a stari n’certi putucchi grandi quantu ‘zucculuni…!

 

CONCETTA: Sempri cu li saggirazzioni stai tuni…!

 

PASCALINO: Ma’, ce ora eti?

 

CONCETTA: Mo’ ‘lucesci.

 

CICI: E già, mo’ ‘lucesci e iu mi n’aggia sciri a sciurnata; (rivolto al figlio) e tuni noni anveci, non è veru?

 

CONCETTA: Ieri sera, non è acchiatu nienti curu maru piccinnu…!

 

PASCALINO: Non aggiu acchiatu nienti!

 

CICI: Ma ci tuni no’ ti faci a vetiri allu sitili, comu fessammamata pienzi ca truevi la sciurnata…! Ce sta’ spietti cu ti venunu a chiamunu ti casa?

 

CONCETTA: Ma è statu allu sitili, totta la sirata, e no’ l’è chiamatu nisciunu!

 

CICI: Siiini! E tu a sciuta ‘nziemi a iddu…?

 

CONCETTA: Nossignori, ma…

 

CICI: E zitta allora; ce cazzatora mi lu sta’ ‘mucci. (rivolto al figlio) Mo’ sa’ c’ha fari? Pigghiti lu ruencu, vabbandi all’antu ti don Augustu e viti ci ti ficchi ‘mienzu all’atri uemmini, ca lu fattori è amicu mia e chiuti ‘nu uecchi puru ‘sta fiata.

 

PASCALINO: Mbè, noni ta’! ‘Dani aggiu sciutu la sittimana passata, vennara li scerbini e ndi pigghiammu puru li mazzati pi sobbra.

 

CONCETTA: E’ veru, maru figghiu, scera li scerbini…

 

CICI: …E li mazzati pi sobbra mo’ vi li tau iu a tutti toi!

 

PASCALINO: Siiih! Eti ca no’ t’ha ‘chiatu ‘signuria ta’. La sittimana passata, staumu tutti sobbra all’arvuli ca sta’ mudaumu e ci staumu ‘na ticina ti uemmini ca nd’erumu ‘mprisintati a fatia senza chiamati; totta a ‘na vota, venni lu patrunu cu li scerbini e dovettumu n’zumpari ti pressa cu ndi ni scappamu, e manu manu ca catiumu, comu all’acieddi, ndi ziccaunu e daliunu cu li manganieddi alla straulona. Iu feci a tiempu cu mi ni scappu ma l’atri, puvirieddi, l’aggiu ‘ncuntrati tutti gnuricati…

 

CICI: E a ‘cussì t’aggia cumbinari iu; a tre ori ti notti!

 

PASCALINO: Aggiu capitu me…! E’ spicciata la rifina.

 

CICI: Ma quali rifina vai truvandu; qua ci no’ si fatia no’ si mangia e non esisti ‘rifina pi nisciunu, l’ha capitu o noni?

 

CONCETTA: Mantieniti carmu Ci’! Lu vagnoni sta’ dici tantu pi diri.

 

PASCALINO: Sini ta’; stà dicu tantu pi diri…

 

CICI: E no’ diciti puttanati allora; ca ‘cquani, tantu cu vi lu ‘ricordu, tinimu tebbutu pi n’atri vint’anni, e iu, no’ sacciu ci nci campu cu lu vesciu paiatu.

 

PASCALINO: (sottovoce) E ce dici, ca lu vuei paiatu ti mei lu tebbutu tua?

 

CONCETTA: (accomodante) Sciamu me, non è lu mumentu cu si fannu n’certi tiscursi moni…

 

CICI: E ‘na fiata no’ facimu ‘sti tiscursi…; e n’atra no’ lu ‘discitamu…; e mo’ no’ lu scumagnamu…; ma si po’ sapiri quandu sant’annecchia, nci pozzu tiri n’cuna cosa a ‘stu filabustieri?

 

CONCETTA: Quandu vuei tuni Ci’! Ma armenu, a prima matina, facimmindi lu segnu ti la croci…

 

CICI: N’atra…!

 

PASCALINO: Va ‘beni me…! ‘sta matina vau do ton Rafeli e nci fazzu ‘ncunu sirviziu cussì, armenu, mi ‘buscu quarche cosa.

 

CICI: E sì; e stamu sempri alla grazia ti don Rafeli ca certu ti ‘ricchesci, …cu lu pinzieri.

 

CONCETTA: A tei, no’ ti ni vai ‘beni mai una.

 

PASCALINO: Ce avi ton Rafeli moni.

 

CICI: Nienti; non avi nienti! Ci non era ca eti nu picca linguacciutu, n’atru picca superbu e poi: malpagatori, fauzu, rufianu e tirchiu; pi lu restu, lu putivi puru iaticari ‘ntra nu puzzu ca, tantu, no si ni ‘dunava nisciunu e si facia ‘nu picca ti beni a totta la surgitati.

 

PASCALINO: A mei no’ mi sembra propria ca eti tirchiu…

 

CICI: Menchia noni! Cuddu spenna puru la peddi ti li pulici e si la vendi a pisu…

 

PASCALINO: Però a mei mi voli beni! e mi ‘ricalau puru ‘nu giaccu sua quandu feci vint’anni!

 

CICI: Vint’anni l’era fatti lu giaccu e iddu si l’era fattu girari armenu quattru-cincu voti prima cu ti lu tai a tei.

 

CONCETTA: Tu esaggeri sempri Ci’! Quandu fatiavi ‘do iddu e ammu avutu ‘bisuegnu ti sordi di l’è ‘mpristati però…

 

CICI: (sfottente) Però, iu, nc’aggiu firmati ‘na caterva ti cambiali ca ‘ncora no’ ‘bencu cu nci paiu li ‘ntaressi a quedda sanguetta ‘malitetta.

 

PASCALINO: Comunqui sia, ci vau do iddu e nci fazzu quarchi sirviziuddu, n’cuna lira mi la ‘ricala e n’certi voti, mi faci trasiri puru ‘ntra casa sua cu mi cupaggia ‘nu picca. E poi stai la signura, tonna Ginueffa, ca, ogni tantu, mi tai lu cafei cu li pasti ca faci edda cu la figghia, la signurina Rachela…

 

CONCETTA: Eh! Viti? Ci tannu puru lu cafei cu li pasti…

 

CICI: …Ca fannu mamma e figghia… (bussano) Apri Cunce’, ca custu lu patrunu Ciccillu ava essiri. (entra Ciccillo: uomo benestante di mezza età, è vestito con abiti di lavoro.)

 

Scena seconda

(Ciccillo e detti)

 

CICCILLO: (salutando, si toglie il cappello e lo appoggia sul mobiletto vicino alla porta d’ingesso assieme alla frusta) Bongiornu a tutti! Menchia ce tiempu vosci, mo’ viti ca n’dava fa’ perdiri la sciurnata!

 

CICI: Bongiornu puru a ‘signuria! E pircè amma perdiri la sciurnata?

 

CONCETTA: Iiih! Mara a ‘mei. Tuttu culuni vai!

 

CICCILLO: E ‘ncuninzatu a scaricari totta a ‘na fiata appena aggiu assutu ti casa e nd’ammu fatti culuni culuni, iu e quedda povara ciuccia ti rusina.

 

CONCETTA: ‘Setiti, ‘leviti ‘stu giaccu ‘bagnatu e mangiti ‘nu picca ti gialletta cauta cauta, ca cussì ti scarfi.

 

PASCALINO: ‘Mbiviti ‘nu bicchieri ti vinu ca ti scarfi megghiu; no’ viti ce friddu ca sta faci? (versa l’ultimo vino nel bicchiere e lo passa a Ciccillo. Quando Ciccillo si siede, si toglie la giacca, la posa alla spalliera della sedia e si gira verso il bicchiere per bere, Pascalino lo anticipa e beve tutto d’un fiato)

 

CICCILLO: Saluti…!

 

CICI: St’acqua non ci vulia propria vosci…!

 

CICCILLO: (prende il fiasco per versarsi il vino, lo trova vuoto e mormora) E già, era megghiu ‘nu bicchieri ti vinu!

 

CICI: (girato verso la finestra, non si accorge di quanto avviene tra Ciccillo e Pascalino) E stà n’forza ti ‘chiui moni!

 

CICCILLO: Mbè, mali non ni faci, e poi nd’amma fari capaci ca mo’ è lu tiempu sua…!

 

CICI: Si, ma a mei mi servunu li sordi ca crai mi scati ‘na cambiali ti cincucientu liri e no’ sacciu ti do’ l’aggia sa pigghiari…!

 

PASCALINO: E rinnovala ta’!

 

CONCETTA: (rivolta al figlio) Zittu, malitettu a tei; non ci scazzicari la piaca.

 

PASCALINO: (alla madre) Ma quali piaca; nci sta’ dau ‘nu buenu cunsigliu.

 

CICI: Lu cirvieddu ‘nicchiarucu ca puerti t’aggia rinnuvari, ci sà cu nci nasci ‘nu picca ti cramegna, armenu.

 

CICCILLO: Avi rascioni lu vagnoni, rinnovala Ci’!

 

CICI: E ce matonna rinnovu; l’aggiu già rinnovata to’ voti e cuddu cravattaru avanza n’atri setti cambiali comu a questa; è propria ‘mpossibbili cu mi faci n’atra grazzia!

 

CICCILLO: A ci ha firmati ‘sti cambiali?

 

CICI: A don Rafeli Cavallo.

 

CICCILLO: Oooh!

 

PASCALINO: Aaah! Apposta nci la puerti tantu cu cuddu cristianu…!

 

CICI: (prende il primo oggetto che trova sotto mano e lo lancia al figlio) Animali comu a tei eti e no’ cristianu.

 

PASCALINO: (piagnucolando) Uè ma…! N’atru picca mi stroppia…!

 

CONCETTA: Uuh! Maru figghiu. (rivolta al marito) Ma ce ti passa pi la capu ‘nzomma; ca mo lu ‘citi cuddu piccinnu! (rivolta al figlio) Sciamu cami’! Ieni cu la mamma tua, ca mo’ vitimu ci nci stai n’ovu e la mamma ti lu sbatti…

 

CICI: N’facci n’ci l’era sbattiri, a tei e a iddu.

 

PASCALINO: Sini ma’, sciammindini! (rivolto verso il padre) po’ tici ca unu si ‘ni vai ti capu.

 

CONCETTA: Zittu; mannaggia quedda lingua ca no’ ti cionca mai! (escono)

 

CICCILLO: E menchia, cu ce bella mutodda si n’è assutu ‘stu vagnoni!

 

CICI: Lassamu perdiri Cicci’; ca sacciu iu cuddu ca stà passu…! Mi lu putivi fa’ fatiari ‘nu picca cu tei, ci sà cu si ‘desciata amprima…

 

CICCILLO: Tu lu sai Ci’, la fatia ca tegnu iu, quedda eti; o ieni tuni o veni iddu… E megghiu però, cu ieni tuni ca lu vagnoni mi pari ‘nu picca mancu scommutu!

 

CICI: C’ha tittu?

 

CICCILLO: Mancu scommutu… ‘nu picca alla ‘bona Ci’!

 

CICI: (annuisce e mormora mortificato) Alla ‘bona si…alla ‘bona! (si alza e va verso la finestra per osservare il tempo) Osci, mi sembra a mei, ca fori non ci vai propria nisciunu...

 

CICCILLO: E pacienza allora; vuol diri ca sciamu crai.

 

CICI: (c.s.) E già, pi tei è facili ma iu no’ sacciu veramenti ‘chiui comu l’aggia cumbinari; no’ sacciu do’ aggia sa sbattiri la capu cu pozzu paiari li tebbiti…

 

CICCILLO: Iu no’ ti pozzu iutari ca tegnu la campagna ti purtari a ‘nanzi, e poi, ognunu sapi li uai sua!

 

CICI: E puru tuni ha rascioni Cicci’! Ognunu sapi li uai ti casa sua…

 

CICCILLO: (con aria illuminata) Però…! Non ha tittu ca li cambiali sontu di don Rafeli?

 

CICI: Sua si; malitettu a mei e a cuddu giurnu ca mi sa suggittai!

 

CICCILLO: Mbè; e iu penzu propria ca ‘ncuna cosa si po’ fari cu si rimedia…

 

CICI: (speranzoso) Siini! Era buenu pi tei; ca tu no’ sai ce suspiru ca mi facivi tirari. Ma eti veramenti tifficili ca cuddu rinnova la cambiali; mi lu tissi chiaru e tundu: "non viniri ‘chiui a circari il rinnovo ca iu, allo scatimiento ti la cambiale, vao tritto tritto allo officiale giudiziale e ti precipoto." E cuddu lu faci alla veramenti, ca pi li sordi no’ uarda facci nè mamma, nè mugghieri e nè figghia!

 

CICCILLO: (sempre più convinto dell’idea che ha avuto) Lu sacciu; ma creu ca ‘sta fiata n’ci la putimu fari, e ci li cosi vannu comu ticu iu, è vinutu puru lu mumentu cu ndi scuntamu ‘ncunu dispiettu ti quiri vecchi vecchi, e no’ sortantu...!

 

CICI: Iu stau ‘ntra li mani tua, tantu, a ‘stu puntu, no’ po’ essiri chiù nera ti la menzanotti.

 

CICCILLO: Tu lassa fari a mei e no’ ti preoccupari, ca mo’ viti ce ti cumbinu… (entra Concetta)

 

CONCETTA: Stà mena chiù acqua, ca Cristu sulu sapi…

 

CICCILLO: Mo’ nci vulia ‘nu sursu ti vinu…!

 

CICI: (prende il fiasco e si accorge che è finito) Cuncè’!

 

CONCETTA: Timmi Ci’; ce vuei?

 

CICI: Lu vinu s’è spicciatu?

 

CONCETTA: Cuddu era tuttu, non ci n’eti chiui; voli sa ‘cattatu!

 

CICCILLO: (rivolto a Cici) Allora sciammindini, ieni cu mei, ca ‘nu bicchieri ti aliatucu sacciu iu do’ ndi l’amma sa pigghiari e accussì ti spiecu ce s’ava fari.

 

CICI: E sciammindini allora… (escono)

 

CONCETTA: ‘Mucciativi bueni bueni ca stà scaraca.

 

PASCALINO: (entra dall’interno) Si n’hannu sciuti ma’!

 

CONCETTA: Si n’hannu sciuti si…

 

PASCALINO: Oooh; finalmenti! Mo’ mi pozzu curcari arretu…(fa il gesto di tuffarsi sul letto)

 

CONCETTA: Noni noni, ce ti cuerchi arretu ca ci torna sierda mi faci vetiri ‘ntra ‘nu mari ti uai!

 

PASCALINO: Ma iu portu suennu ma’!

 

CONCETTA: ‘Laviti la facci e iessi cami’; non ha tittu ca ha sciri ‘do don Rafeli?

 

PASCALINO: Sini ma’; chiù tardu però…!

 

CONCETTA: E iessi lu stessu va’!

 

PASCALINO: Aggiu capitu me! Prima mi ‘ni vau ti ‘ntra ‘sta casa e megghiu eti osci; statti ‘bona ma’! (esce)